پیپلز پارٹی کے ساتھ کوئی اختلاف نہیں، صدر آصف زرداری بھی اپنی مدت پوری کریں گے، رانا ثنااللہ

وزیراعظم کے مشیر برائے سیاسی امور رانا ثنا اللہ نے کہا ہے کہ مسلم لیگ (ن) اور پیپلز پارٹی کے درمیان کوئی اختلافات نہیں، پیپلز پارٹی کے کچھ تحفظات ہیں جنہیں دور کرنے کے لیے بات چیت جاری ہے۔
پارلیمنٹ میں صحافیوں سے گفتگو کرتے ہوئے رانا ثنا اللہ نے کہا کہ پیپلز پارٹی نے آزاد کشمیر میں اپوزیشن کا کردار ادا کرنے کا فیصلہ کیا ہے۔
ان کا کہنا تھا کہ موجودہ صورتحال کو دونوں جماعتوں کے درمیان اختلافات میں اضافے سے تعبیر نہیں کیا جاسکتا۔
آزاد کشمیر میں صدارتی انتخاب کے حوالے سے سوال پر رانا ثنا اللہ نے کہا کہ مسلم لیگ (ن) نے ابھی تک صدر کے لیے اپنا امیدوار سامنے نہیں لایا۔
تاہم انہوں نے اس تاثر کی تردید کی کہ پیپلز پارٹی اور مسلم لیگ (ن) کے درمیان اختلافات پیدا ہوگئے ہیں یا پیپلز پارٹی صدارتی انتخاب کے لیے کسی امیدوار کو سامنے لا رہی ہے۔
رانا ثنا اللہ نے کہا کہ پیپلز پارٹی کے کچھ تحفظات ہیں، جن پر دونوں جماعتوں کے درمیان ملاقاتیں ہوئی ہیں اور آئندہ بھی بات چیت جاری رہے گی۔
انہوں نے امید ظاہر کی کہ مذاکرات کے ذریعے پیپلز پارٹی کے تحفظات دور کرلیے جائیں گے۔
وزیراعظم کے مشیر نے واضح کیا کہ صدر مملکت آصف علی زرداری کہیں نہیں جا رہے اور وہ اپنی آئینی مدت پوری کریں گے۔