ژوب ، لورالائی میں گیس پلانٹ کی تنصیب سے زیتون کے جنگلات کو تحفظ ملے گا، سینیٹربلال مندوخیل

اسلا م آباد:وفاقی کابینہ سے ژوب اور لورالائی میں گیس پلانٹ کی منظوری کے بعد علاقے کے عوام کی قسمت جاگ اٹھی ،وفاقی کابینہ نے گیس پلانٹ منصوبے کی منظوری سینیٹر بلال مندوخیل کی تجویز و مطالبے پر دی ہے-سینیٹر شیخ بلال احمد خان مندوخیل نے کہاہے کہ ان کی تجویز اور مطالبے پر وفاقی کابینہ نے ژوب اور لورالائی میں گیس پلانٹس کی تنصیب کے منصوبے کی منظوری دے دی ہے۔ اپنے بیان میں انہوں نے کہا کہ جلد ای سی سی سے فنڈز جاری کرا کر منصوبے کا پراسیس اور ٹینڈر کیا جائے گا، جبکہ سوئی گیس حکام تنصیب کا کام کریں گے۔ان کے مطابق دوسرے مرحلے میں قلعہ سیف اللہ، مسلم باغ، چمن اور قلعہ عبداللہ میں بھی گیس پلانٹس کی منظوری کے لیے اقدامات کیے جائیں گے۔سینیٹر بلال مندوخیل نے کہا کہ منصوبے کی تکمیل سے عوام کو سستے گیس سلنڈر دستیاب ہوں گے اور ژوب و شیرانی کے قیمتی زیتون کے جنگلات کے تحفظ میں مدد ملے گی۔