مون سون بارشوں سے جاں بحق افراد کی تعداد 151 ہوگئی، 8 اگست سے نئے سلسلے کی پیشگوئی، الرٹ جاری

ملک بھر میں 26 جون سے جاری مون سون بارشوں کے باعث جاں بحق افراد کی تعداد بڑھ کر 151 ہو گئی ہے، جبکہ 448 افراد زخمی ہوئے ہیں۔
نیشنل ڈیزاسٹر مینجمنٹ اتھارٹی نے 8 اگست سے بارشوں کے ایک نئے سلسلے کی پیش گوئی کرتے ہوئے متعلقہ اداروں کو الرٹ رہنے کی ہدایت کی ہے۔
نیشنل ڈزآسٹر منیجمنٹ اتھارٹی (این ڈی ایم اے )کی تازہ صورتحال رپورٹ کے مطابق مون سون بارشوں سے سب سے زیادہ جانی نقصان خیبر پختونخوا میں ہوا، جہاں 64 افراد جان کی بازی ہار گئے۔ پنجاب میں 53، سندھ میں 15، بلوچستان میں 8، آزاد کشمیر میں 10 جبکہ گلگت بلتستان میں 1 شخص جاں بحق ہوا۔
رپورٹ کے مطابق زیادہ تر اموات ڈوبنے، گھروں کی چھتیں یا دیواریں گرنے، کرنٹ لگنے اور اچانک آنے والے سیلابی ریلوں کے باعث ہوئیں۔
این ڈی ایم اے کے مطابق بارشوں سے اب تک 448 افراد زخمی ہو چکے ہیں، جن میں 150 بچے، 108 خواتین اور 190 مرد شامل ہیں۔
این ڈی ایم اے نے خبردار کیا ہے کہ موجودہ موسمی صورتحال کے پیش نظر 8 اگست سے ملک میں بارشوں کا ایک نیا سلسلہ شروع ہونے کا امکان ہے۔
رپورٹ کے مطابق پنجاب، شمال مشرقی سندھ اور خیبر پختونخوا کے مختلف علاقوں میں درمیانے درجے کی بارشیں متوقع ہیں۔
مزید بتایا گیا ہے کہ 10 اگست سے مغربی ہواؤں کا نیا سلسلہ ملک کے بالائی علاقوں میں داخل ہوگا، جس کے نتیجے میں اسلام آباد، آزاد کشمیر، گلگت بلتستان، خیبر پختونخوا، بالائی پنجاب اور بڑے دریاؤں کے بالائی علاقوں میں درمیانی سے شدید بارشوں کا امکان ہے۔
این ڈی ایم اے نے متعلقہ اداروں کو ممکنہ بارشوں کے پیش نظر پیشگی حفاظتی اقدامات یقینی بنانے، ہنگامی صورتحال سے نمٹنے کے انتظامات مکمل رکھنے اور نشیبی علاقوں میں خصوصی نگرانی کی ہدایت کی ہے تاکہ ممکنہ نقصانات کو کم سے کم رکھا جا سکے۔