آٹے کی قیمتوں میں پھر اضافہ، 20 کلو تھیلا 3 ہزار روپے سے تجاوز کرگیا

ملک کے مختلف شہروں میں آٹے کی قیمتوں میں ایک ہفتے کے دوران نمایاں اضافہ ریکارڈ کیا گیا ہے، جہاں 20 کلو آٹے کے تھیلے کی قیمت میں 100 روپے تک اضافہ ہوا۔
ادارہ شماریات کے مطابق کئی بڑے شہروں میں آٹے کا تھیلا 3 ہزار روپے سے تجاوز کرگیا، جبکہ اسلام آباد میں اس کی قیمت ملک بھر میں سب سے زیادہ ریکارڈ کی گئی۔
ادارہ شماریات کے جاری کردہ اعداد و شمار کے مطابق اسلام آباد میں 20 کلو آٹے کے تھیلے کی زیادہ سے زیادہ قیمت 3 ہزار 133 روپے تک پہنچ گئی، جبکہ پشاور میں یہی تھیلا 3 ہزار 100 روپے اور راولپنڈی میں 3 ہزار 93 روپے تک فروخت ہو رہا ہے۔
کراچی میں ایک ہفتے کے دوران آٹے کے تھیلے کی قیمت میں 100 روپے اضافہ ریکارڈ کیا گیا، جس کے بعد 20 کلو تھیلا 3 ہزار روپے تک پہنچ گیا۔ لاڑکانہ میں بھی قیمت 100 روپے اضافے کے بعد 2 ہزار 600 روپے تک ہوگئی۔
رپورٹ کے مطابق بہاولپور میں 20 کلو آٹے کا تھیلا 2 ہزار 960 روپے، جبکہ بنوں میں 2 ہزار 950 روپے تک فروخت ہو رہا ہے۔
حیدرآباد، ملتان، سیالکوٹ اور گوجرانوالہ میں آٹے کے 20 کلو تھیلے کی قیمت 2 ہزار 800 روپے تک ریکارڈ کی گئی۔ سرگودھا میں یہ قیمت 2 ہزار 793 روپے، جبکہ کوئٹہ میں 2 ہزار 750 روپے تک پہنچ چکی ہے۔
ادارہ شماریات کے مطابق سکھر میں ایک ہفتے کے دوران آٹے کے 20 کلو تھیلے کی قیمت میں 60 روپے اضافہ ہوا، جس کے بعد قیمت 2 ہزار 560 روپے ہوگئی۔ بنوں میں بھی 50 روپے اضافے کے بعد 20 کلو آٹے کا تھیلا 2 ہزار 950 روپے تک پہنچ گیا۔