اے ایف ایف کی مزاحمت طالبان کے مرکز اقتدار تک پہنچ گئی، کابل میں فوجی لاجسٹک نظام پر حملے کا دعویٰ

افغانستان فریڈم فرنٹ (اے ایف ایف) نے کابل ملٹری ایئرپورٹ پر راکٹ حملے کی ذمہ داری قبول کرتے ہوئے دعویٰ کیا ہے کہ کارروائی میں طالبان کے فوجی لاجسٹک نظام اور نقل و حمل کی تنصیبات کو نشانہ بنایا گیا۔
تاہم حملے سے متعلق ہلاکتوں، نقصان اور دیگر دعوؤں کی آزاد ذرائع سے تصدیق نہیں ہو سکی، جبکہ طالبان نے بھی خبر لکھے جانے تک کوئی باضابطہ ردعمل جاری نہیں کیا۔
کابل سے موصول ہونے والی اطلاعات کے مطابق افغانستان فریڈم فرنٹ ‘اے ایف ایف’ نے دعویٰ کیا ہے کہ اس نے کابل ملٹری ایئرپورٹ پر راکٹ حملہ کیا، جس میں طالبان کے فوجی انفراسٹرکچر، لاجسٹک سہولیات اور نقل و حمل سے متعلق تنصیبات کو نشانہ بنایا گیا۔
تنظیم کے مطابق حملے کے نتیجے میں فوجی تنصیبات کو نمایاں نقصان پہنچا، جبکہ متعدد طالبان جنگجو ہلاک اور زخمی ہوئے۔ تاہم ان دعوؤں کی آزاد ذرائع سے تصدیق نہیں ہو سکی ہے اور طالبان کی جانب سے بھی فوری طور پر کوئی باضابطہ بیان سامنے نہیں آیا۔
اے ایف ایف نے اپنے بیان میں کہا ہے کہ یہ کارروائی اس بات کا ثبوت ہے کہ طالبان مخالف مزاحمتی سرگرمیاں شمالی افغانستان کے روایتی علاقوں سے نکل کر اب دارالحکومت کابل تک پہنچ چکی ہیں۔
تنظیم کا کہنا ہے کہ مزاحمتی قوتیں اب ملک کے حساس اور اہم فوجی اہداف کو نشانہ بنانے کی صلاحیت رکھتی ہیں۔