دونوں ہاتھوں سے محروم طالب علم رفیع اللہ کا ڈاکٹر بننے کا خواب، وزیراعلیٰ بلوچستان نے ذمہ داری اٹھا لی

عزم، حوصلے اور محنت کی مثال بننے والے دونوں ہاتھوں سے محروم طالب علم رفیع اللہ کی جدوجہد نے وزیراعلیٰ بلوچستان میر سرفراز بگٹی کا دل جیت لیا۔ وزیراعلیٰ نے رفیع اللہ سے چیف منسٹر سیکرٹریٹ میں خصوصی ملاقات کی اور اس کے ڈاکٹر بننے کے خواب کی تکمیل کے لیے ہر ممکن تعاون کی یقین دہانی کرادی۔
ملاقات کے دوران رفیع اللہ نے وزیراعلیٰ بلوچستان کو اپنی تعلیمی جدوجہد اور مستقبل کے عزائم سے آگاہ کرتے ہوئے ڈاکٹر بننے کی خواہش کا اظہار کیا۔
اس موقع پر میر سرفراز بگٹی نے کہا کہ ’آپ کا خواب اب حکومت بلوچستان کا عزم ہے، آپ کی تعلیم کے تمام اخراجات حکومت برداشت کرے گی۔‘
وزیراعلیٰ نے کہا کہ رفیع اللہ کی ہمت اور حوصلہ بلوچستان سمیت ملک بھر کے نوجوانوں کے لیے ایک روشن مثال ہے۔ انہوں نے کہا کہ جسمانی معذوری کسی بھی صورت کامیابی کی راہ میں رکاوٹ نہیں بن سکتی، اصل طاقت انسان کا عزم، صلاحیت اور محنت ہے۔
میر سرفراز بگٹی نے رفیع اللہ کو یقین دلایا کہ جہاں بھی اس کے علاج کی ممکنہ سہولت دستیاب ہوئی، حکومت بلوچستان اس کے علاج کے لیے مکمل تعاون کرے گی۔ انہوں نے کہا کہ رفیع اللہ کو مایوس ہونے کی ضرورت نہیں، حکومت اس کے بہتر مستقبل کے لیے ہر ممکن سہولت فراہم کرے گی۔
وزیراعلیٰ نے کہا کہ صلاحیت اور جذبہ رکھنے والے ہر نوجوان کی سرپرستی حکومت کی ذمہ داری ہے۔ رفیع اللہ جیسے باہمت نوجوان بلوچستان کا روشن مستقبل ہیں اور ان کی کامیابی ہم سب کی کامیابی ہوگی۔
انہوں نے متعلقہ حکام کو ہدایت کی کہ رفیع اللہ کی تعلیم، علاج اور دیگر ضروری سہولیات کے لیے فوری اقدامات کیے جائیں تاکہ وہ اپنے خواب کی تعبیر حاصل کر سکے۔
ملاقات کے دوران رفیع اللہ کے عزم اور حوصلے کو سراہتے ہوئے وزیراعلیٰ نے کہا کہ اس نوجوان نے ثابت کر دیا ہے کہ مشکلات اور جسمانی کمزوریاں بلند مقاصد کے حصول میں رکاوٹ نہیں بن سکتیں۔