حنا جاوید کے بہیمانہ قتل پر خاتونِ اول کا اظہارِ تشویش

خاتونِ اول بی بی آصفہ بھٹو زرداری نے راولپنڈی میں حنا جاوید کے مبینہ بہیمانہ قتل پر گہرے دکھ اور تشویش کا اظہار کرتے ہوئے اہلخانہ سے تعزیت اور یکجہتی کا اظہار کیا ہے۔
خاتونِ اول نے حکومتِ پنجاب پر زور دیا کہ ہولناک واقعے کی مکمل اور شفاف تحقیقات کرائی جائیں اور قتل میں ملوث عناصر کو قانون کے کٹہرے میں لاکر قرار واقعی سزا دی جائے تاکہ آئندہ کسی کو ایسے سنگین جرم کی جرأت نہ ہو۔
بی بی آصفہ بھٹو زرداری نے پاکستان میں خواتین کے خلاف ایسے واقعات میں اضافے پر بھی تشویش کا اظہار کرتے ہوئے امید ظاہر کی کہ خواتین کے تحفظ اور مستقبل میں ایسے جرائم کی روک تھام کے لیے مؤثر اقدامات کیے جائیں گے۔
واضح رہے کہ راولپنڈی کے علاقے لال کرتی میں 45 سالہ حنا جاوید کے مبینہ قتل کا مقدمہ ان کے بھائی کی مدعیت میں درج کیا گیا ہے۔ پولیس نے نامزد ملزمان حنا کے شوہر فیصل اصغر اور گھریلو ملازم ذیشان کو گرفتار کرلیا ہے، جبکہ اہلخانہ نے سسر اصغر علی فیاض کی گرفتاری کا بھی مطالبہ کیا ہے۔ پولیس کے مطابق واقعے کی تحقیقات جاری ہیں۔