کرسٹیانو رونالڈو اور جارجینا کی متوقع شادی ایک بار پھر خبروں کی زینت، تاریخ بھی سامنے آگئی

عالمی شہرت یافتہ پرتگالی فٹبالر کرسٹیانو رونالڈو اور ان کی منگیتر جارجینا روڈریگز کی شادی سے متعلق ایک بار پھر مختلف رپورٹس سامنے آ رہی ہیں، جن میں دعویٰ کیا جا رہا ہے کہ دونوں جلد رشتۂ ازدواج میں منسلک ہو سکتے ہیں۔
میڈیا رپورٹس کے مطابق رونالڈو اور جارجینا کی شادی پرتگال کے جزیرے مڈیرا میں متوقع ہے، جہاں رونالڈو کی پیدائش ہوئی اور انہوں نے ابتدائی زندگی گزاری۔
اگرچہ دونوں کی جانب سے اب تک شادی کی تاریخ یا مقام کے حوالے سے کوئی باضابطہ اعلان نہیں کیا گیا، تاہم برطانوی میڈیا کا دعویٰ ہے کہ تقریب 8 اگست کو منعقد ہونے کا امکان ہے، جس کے باعث کھیلوں اور شوبز حلقوں میں اس موضوع پر خاصی دلچسپی پائی جا رہی ہے۔
برطانوی اخبار دی سن کی رپورٹ کے مطابق شادی کی مرکزی تقریب مڈیرا کے دارالحکومت فنشال میں واقع تاریخی فنشال کیتھیڈرل میں منعقد کیے جانے کا امکان ہے، جبکہ اس کے بعد مہمانوں کے اعزاز میں ساوائے پیلس فائیو اسٹار ہوٹل میں استقبالیہ دیا جا سکتا ہے۔
رپورٹس میں بتایا گیا ہے کہ رونالڈو نے گزشتہ برس تقریباً آٹھ سالہ تعلق کے بعد جارجینا کو شادی کی پیشکش کی تھی۔ 40 سالہ فٹبالر نے انہیں قیمتی ہیرے کی انگوٹھی پیش کی، جسے جارجینا نے قبول کر لیا تھا۔
بعد ازاں جارجینا نے اپنے انسٹاگرام اکاؤنٹ پر اس ہیرے کی انگوٹھی کی تصویر بھی شیئر کی، جس میں ان کا ہاتھ رونالڈو کے ہاتھ پر رکھا ہوا تھا اور ان کی انگلی میں پہنائی گئی انگوٹھی نمایاں نظر آ رہی تھی۔
رونالڈو اور جارجینا کی محبت کا آغاز قریباً 8 برس قبل اس وقت ہوا جب جارجینا اسپین کے شہر میڈرڈ میں ایک معروف فیشن برانڈ کے آؤٹ لیٹ پر ملازمت کر رہی تھیں۔
دونوں کو پہلی مرتبہ 2017 میں عوامی سطح پر ایک ساتھ دیکھا گیا، جس کے بعد ان کے تعلق نے دنیا بھر میں توجہ حاصل کی۔
رونالڈو اور جارجینا مجموعی طور پر 5 بچوں کی پرورش کررہے ہیں، تاہم اپریل 2022 میں ان کے جڑواں بچوں میں سے ایک انتقال کر گیا تھا، جسے دونوں نے اپنی زندگی کا انتہائی تکلیف دہ لمحہ قرار دیا تھا۔