سردار شاہ زمان علیزئی کا اغواء بلوچ روایات پر حملہ ہے، فوری بازیاب کیا جائے، سردارانِ سراوان

کوئٹہ: ۔سراوان بیلٹ کے معتبرین اور بلوچ سرداروں نے اپنے مشترکہ اعلامیے میں ممتاز قبائلی رہنما سردار شاہ زمان علیزئی کے ناگہانی اغواء کی شدید ترین الفاظ میں مذمت کرتے ہوئے اسے ننگِ خلق، کھلم کھلا ظلم اور صدیوں پر محیط بلوچ روایت و ننگ و ناموس کی سنگین پامالی قرار دیا ہے۔ قبائلی قائدین کا کہنا تھا کہ بلوچ سرداروں کی جان، مال اور حرمت پر دست درازی کسی صورت قابلِ برداشت نہیں۔ یوں دانستہ طور پر روزِ روشن میں ایک قبائلی سربراہ کی عزت پر ہاتھ ڈال کر اغواء کرنے والے آخر کون سے مذموم مقاصد حاصل کرنا چاہتے ہیں؟ قوم کے سامنے اس کی وضاحت کریں۔ سردارانِ سراوان نے واضح کیا کہ بلوچ سردار اپنی اعلیٰ روایات، عزتِ نفس اور پاسداریِ عہد کے امین رہے ہیں اور انہوں نے ہمیشہ اپنی قوم و ملک کی خیرخواہی میں زیست کی ہے۔ علیزئی قوم کے سربراہ سردار شاہ زمان علیزئی ایک مدبر، مخلص اور بے لوث عوامی رہنما ہیں۔ ان کا اس طرح اغواء ہونا پوری وادیِ بلوچستان کے لیے ایک صدمہِ عظیم ہے، جس نے عوام کے دلوں میں شدید غم و غصے اور تشویش کی آگ بھڑکا دی ہے۔ انہوں نے حتمی اور پرزور مطالبہ کیا کہ سردار شاہ زمان علیزئی کو بلا تاخیر بحفاظت بازیاب کرایا جائے اور مستقبل میں اس نوعیت کے اقدامات سے مکمل اجتناب برتا جائے۔