پاکستان سے یورپ غیر قانونی نقل مکانی میں 64 فیصد کمی لاچکے، محسن نقوی

وفاقی وزیر داخلہ محسن نقوی کا کہنا کہ پاکستان نے یورپ میں غیر قانونی نقل مکانی میں 64 فیصد کمی ریکارڈ کی ہے جو انسانی اسمگلنگ اور غیر قانونی ہجرت کو روکنے کے لیے حکومتی کوششوں کو اجاگر کرتی ہے۔
وزیر داخلہ نے یہ بات انٹرنیشنل سینٹر فار مائیگریشن پالیسی ڈویلپمنٹ کی ڈائریکٹر جنرل سوزین راب اور یورپی یونین بارڈر اینڈ کوسٹ گارڈ ایجنسی (فرنٹیکس) کے ایگزیکٹو ڈائریکٹر ہانس لیجٹنس کے ساتھ الگ الگ ملاقاتوں کے دوران کہی۔
ملاقاتوں میں غیر قانونی نقل مکانی کو روکنے، بارڈر مینجمنٹ کو بہتر بنانے اور اس شعبے میں مشترکہ کوششوں کو بڑھانے کے لیے تعاون کو مضبوط بنانے پر توجہ مرکوز کی گئی۔
اس دوران پاکستان، انٹرنیشنل سینٹر فار مائیگریشن پالیسی ڈویلپمنٹ اور فرنٹیکس نے غیر قانونی نقل مکانی کو روکنے اور بارڈر سکیورٹی میکانزم کو مضبوط بنانے کے لیے تعاون کو بڑھانے پر اتفاق کیا۔ شرکا نے مؤثر مائیگریشن مینجمنٹ اور بارڈر کنٹرول کے لیے مربوط اقدامات کے عزم کا بھی اعادہ کیا۔ محسن نقوی نے کہا کہ محدود وسائل کے باوجود غیر قانونی نقل مکانی میں 64 فیصد کمی ایک چیلنجنگ کام تھا۔ انہوں نے کہا کہ حکومت نے غیر قانونی نقل مکانی کو روکنے کو ایک بڑا چیلنج قرار دیا تھا اور پوری ٹیم نے اس کمی کو حاصل کرنے کے لیے مسلسل کام کیا۔